சென்னை :தமிழ் திரையுலகின் பிரபல நகைச்சுவை நடிகர் மதன் பாப் (71) உடல்நலக் குறைவால் நேற்று மாலை 5 மணியளவில் சென்னை அடையாறில் உள்ள தனது இல்லத்தில் காலமானார். எஸ். கிருஷ்ணமூர்த்தி என்ற இயற்பெயர் கொண்ட மதன் பாப், புற்றுநோயால் பாதிக்கப்பட்டு சிகிச்சை பெற்று வந்த நிலையில், சிகிச்சை பலனின்றி உயிரிழந்தார். அவரது மறைவு, தமிழ் திரையுலகில் பெரும் சோகத்தை ஏற்படுத்தியுள்ளது.
மதன் பாப், தமிழ், தெலுங்கு, மலையாளம், மற்றும் இந்தி உள்ளிட்ட மொழிகளில் 150-க்கும் மேற்பட்ட திரைப்படங்களில் நடித்தவர். அவரது தனித்துவமான முகபாவனைகள், உடல் மொழி, மற்றும் நகைச்சுவை உணர்வு ரசிகர்களை வெகுவாகக் கவர்ந்தது. ‘நம்மவர்’, ‘பைரவா’, ‘ஜீன்ஸ்’ உள்ளிட்ட பல படங்களில் அவரது நகைச்சுவை காட்சிகள் இன்றும் ரசிகர்களால் கொண்டாடப்படுகின்றன. அவரது உடல், அடையாறில் உள்ள அவரது இல்லத்தில் அஞ்சலிக்காக வைக்கப்பட்டுள்ளது.
எனவே, பிரபலங்கள் பலரும் நேரில் சென்று அவருடைய உடலுக்கு அஞ்சலி செலுத்திவிட்டு குடும்பத்தினருக்கு ஆறுதல்களை தெரிவித்து வருகிறார்கள். அந்த வகையில் நடிகர் சண்முக பாண்டியன், மதன் பாப்-இன் மறைவுக்கு முதல் ஆளாக அஞ்சலி செலுத்தினார். “மதன் பாப் அவர்களின் மறைவு திரையுலகிற்கு பேரிழப்பு. அவரது நகைச்சுவை மற்றும் எளிமையான பண்பு எப்போதும் நினைவில் இருக்கும்,” என்று சண்முக பாண்டியன் தெரிவித்தார்.
மதன் பாப்-இன் மறைவுக்கு திரையுலக பிரபலங்கள் மற்றும் ரசிகர்கள் சமூக வலைதளங்களில் இரங்கல் தெரிவித்து வருகின்றனர். மதன் பாப்-இன் குடும்பத்தினர், இன்று (ஆகஸ்ட் 3, 2025) மாலை அவரது இறுதி அஞ்சலி மற்றும் நல்லடக்க நிகழ்வுகளை நடத்த திட்டமிட்டுள்ளனர். திரையுலகைச் சேர்ந்த பலரும் இந்த நிகழ்வில் கலந்துகொள்ள உள்ளனர். மதன் பாப் இந்த மண்ணை விட்டு மறைந்தாலும் அவருடைய நகைச்சுவை பயணம், தமிழ் சினிமா ரசிகர்களின் இதயங்களில் நீங்காத இடத்தில் எப்போதுமே இருக்கும் என்பது குறிப்பிடத்தக்கது.