காவலர் கையை கடித்த தவெக தொண்டர்...கைது செய்த காவல்துறை!

தமிழக வெற்றிக் கழகத்தின் (தவெக) தருமபுரி மாவட்ட நிர்வாகிகள் நால்வர் நள்ளிரவில் கைது செய்யப்பட்ட சம்பவம் அரசியல் பரபரப்பை ஏற்படுத்தியுள்ளது. நேற்று (டிசம்பர் 7) மாலை தருமபுரி மாவட்டம் பாலக்கோடு அருகே செயல்பட்டு வந்த தனியார் மதுபான பாரை உடனடியாக மூட வலியுறுத்தி தவெகவினர் சாலை மறியல் போராட்டம் நடத்தினர். போராட்டத்தில் கலந்து கொண்ட தவெக மாவட்ட செயலாளர் உட்பட சுமார் 50-க்கும் மேற்பட்டோர் கைது செய்யப்பட்டு பின்னர் பிணையில் விடுவிக்கப்பட்டனர்.

ஆனால் நள்ளிரவு 12 மணிக்கு மேல் தவெக மாவட்ட துணைச் செயலாளர் ஒருவர் உள்ளிட்ட நான்கு நிர்வாகிகளை போலீசார் மீண்டும் வீடுகளுக்குச் சென்று கைது செய்தனர். அவர்கள் மீது “போராட்டத்தின் போது காவலரின் கையை கடித்தல், அரசுப் பணியைத் தடுத்தல்” உள்ளிட்ட குற்றங்கள் சுமத்தப்பட்டுள்ளதாகத் தெரிகிறது. கைது செய்யப்பட்ட நிர்வாகிகள் தற்போது பாலக்கோடு காவல் நிலையத்தில் வைக்கப்பட்டுள்ளனர்.

தவெக தரப்பில் இருந்து வெளியான குற்றச்சாட்டு: “மதுபான பாருக்கு எதிராக மக்கள் நலன் கருதிய அமைதியான போராட்டம் நடத்தினோம். போலீசார் தேவையின்றி அடக்குமுறை கையாண்டனர். நள்ளிரவில் வீடுகளுக்குச் சென்று கைது செய்தது ஜனநாயக விரோதமானது” என்று கட்சியின் மாவட்ட நிர்வாகிகள் கண்டனம் தெரிவித்துள்ளனர். இது திமுக அரசு தவெகவை அடக்க நினைப்பதாகவும் அவர்கள் குற்றம் சாட்டியுள்ளனர்.

தருமபுரி மாவட்டத்தில் மதுபான பார்கள் மூடப்பட வேண்டும் என்ற கோரிக்கையை தவெக தொடர்ந்து வலியுறுத்தி வருவது குறிப்பிடத்தக்கது. கடந்த சில மாதங்களாகவே பல்வேறு இடங்களில் தவெகவினர் மதுபான பார்களுக்கு எதிராக போராட்டம் நடத்தி வருகின்றனர். இந்தக் கைது சம்பவம், 2026 சட்டமன்றத் தேர்தலுக்கு முன்னதாக தவெகவுக்கும் திமுக அரசுக்கும் இடையிலான மோதலை மேலும் தீவிரப்படுத்தியுள்ளது.