தொடங்கியது மறுவாக்கு எண்ணிக்கை! ராதபுரம் சட்டமன்ற தொகுதியின் வெற்றியாளர் யார்?!

கடந்த 2016 ஆம் ஆண்டு நடைபெற்ற சட்டமன்ற தேர்தலில், ராதாபுரம் தொகுதியில் திமுக சார்பாக அப்பாவு மற்றும் அதிமுக சார்பில் இன்பதுரை ஆகிவரும் போட்டியிட்டனர். இதில் வாக்கு எண்ணிக்கை நடைபெற்றபோது 18 சுற்றுகளில் திமுக வேட்பாளர் அப்பாவு முன்னிலையில் இருந்தார். ஆனால் 19, 20, 21 ஆகிய சுற்றுகளில் வாக்குகள் எண்ணப்பட்டு 49 வாக்குகள் வித்தியாசத்தில் அதிமுக வேட்பாளர் இன்பதுரை வெற்றி பெற்றதாக அறிவிக்கப்பட்டது.
இதில் அதிமுக வேட்பாளருக்கு 69,590 வாக்குகளும், திமுக வேட்பாளருக்கு 69,541 வாக்குகளும்  பெற்றதாக அறிவிக்கப்பட்டது. இதில் 203 தபால் தபால் வாக்குகள் செல்லாதவையாக அறிவிக்கப்பட்டது.
அதனை எதிர்த்து திமுக வேட்பாளர் அப்பாவு சென்னை உயர் நீதிமன்றத்தில் வழக்கு தொடர்ந்தார். அந்த வழக்கில் கடைசி மூன்று சுற்றுகள் அதாவது 19 20 21 ஆகிய சுற்றுகளில் எண்ணப்பட்ட வாக்குகள் சரியாக எண்ணப்படவில்லை எனவும், 203 தபால் வாக்குகள் செல்லாதவையாக  அறிவிக்கப்பட்டது எனவும், எனவே அந்த வாக்குகளை திரும்ப எண்ண வேண்டும் எனவும், கூறப்பட்டிருந்தது. அந்த வழக்கு விசாரணையில், இன்று உயர் நீதிமன்ற வளாகத்தில் அந்த கடைசி 3 கட்ட வாக்குகளும், தபால் வாக்குகளும் எண்ணப்படும் என அறிவிக்கப்பட்டிருந்தது.
தற்போது ராதாபுரம் சட்டமன்ற தொகுதியின் மறுவாக்கு எண்ணிக்கை உயர்நீதிமன்ற வளாகத்தில் வைத்து நடைபெறுகிறது.