சென்னை : தமிழக அரசியலில் தற்பொழுது நிலவி வரும் குழப்பமான சூழல்கள் குறித்துச் செய்தியாளர்களைச் சந்தித்த அமைச்சர் சிடிஆர் நிர்மல்குமார், திமுக மற்றும் அதிமுக கட்சிகளின் அரசியல் நகர்வுகள் குறித்து அதிரடியான கருத்துக்களைப் பதிவு செய்துள்ளார். குறிப்பாக, திமுக கூட்டணி உடைந்து சிதறியதற்கு, பாஜகவின் மறைமுக ஆதரவோடு அதிமுக-வுடன் இணைந்து குறுக்கு வழியில் ஆட்சி அமைக்க ஸ்டாலின் மேற்கொண்ட முயற்சிகளே பிரதான காரணம் என்று அவர் பகிரங்கமாகக் குற்றம் சாட்டியுள்ளார்.
மதிமுக பொதுச்செயலாளர் வைகோ திமுக கூட்டணியில் இருந்து வெளியேறியது குறித்துப் பேசிய அமைச்சர் நிர்மல்குமார், "அய்யா வைகோ அவர்கள் அரசியலில் மிகவும் மூத்தவர்; அவர் என்றும் பதவிக்காக ஆசைப்பட்டவர் அல்ல. அவருக்கு அமைச்சர் பதவியோ அல்லது முதலமைச்சர் பதவியோ தட்டில் வைத்து வழங்கினாலும், தான் கொண்ட கொள்கைப் பாதையிலேயே அவர் தொடர்ந்து பயணிக்கக் கூடியவர்" என்று புகழாரம் சூட்டினார்.
நேர்மையாக அரசியல் செய்ய விரும்பும் எந்தவொரு தலைவரும், திமுக-வின் இத்தகைய குதிரை பேரம் மற்றும் குறுக்கு வழி அரசியலோடு பயணிக்க விரும்ப மாட்டார்கள் என்பதால் தான் வைகோ கூட்டணியை விட்டு வெளியேறி விட்டார் என்று அவர் திட்டவட்டமாகக் கூறியுள்ளார்.
அமைச்சர் சரத்குமார் போதைப்பொருள் பயன்படுத்தியதாகக் கூறப்பட்டு சமூக வலைதளங்களில் வைரலாகி வரும் சர்ச்சைக்குரிய வீடியோ குறித்துச் செய்தியாளர்கள் எழுப்பிய கேள்விக்கு, "அமைச்சர் சரத்குமார் அந்த வீடியோ குறித்து ஏற்கனவே முறையான விளக்கத்தை அளித்துள்ளார். அந்த விளக்கம் தற்போது தவெக (தமிழக வெற்றிக் கழகம்) தலைமையின் தீவிர பரிசீலனைக்கு உட்படுத்தப்பட்டுள்ளது" என்று நிர்மல்குமார் தெரிவித்துள்ளார்.
திமுக மற்றும் அதிமுக ஆகிய இரு கட்சிகளும் தற்பொழுது காலை வரை கூட குறுக்கு வழியில் ஆட்சி அமைப்பதற்கான முயற்சிகளில் ஈடுபட்டு வருவதாகக் குற்றம் சாட்டிய நிர்மல்குமார், "பாஜக-வின் மறைமுக ஆதரவோடு தமிழகத்தில் ஆட்சியைக் கைப்பற்ற வேண்டும் என்பதற்காகவே அதிமுக-வை திமுக அணுகியது; இத்தகைய தரம் தாழ்ந்த அரசியல் நடவடிக்கைகளால்தான் கூட்டணி உடையக் காரணம்" என்று மிகக் காட்டமான குற்றச்சாட்டை முன்வைத்துள்ளார். தமிழக அரசியலில் தற்பொழுது நிலவி வரும் இந்த அதிரடித் தகவல்கள் அரசியல் களத்தில் மீண்டும் ஒரு புதிய விவாதத்தை ஏற்படுத்தியுள்ளது.