சென்னை :கரூர் மாவட்டத்தில் கடந்த மாதம் 27 அன்று தமிழ் வெற்றிக் கழக (த.வெ.க.) தலைவர் விஜய்யின் பிரசார கூட்டத்தில் ஏற்பட்ட கூட்ட நெரிசலில் 41 பேர் உயிரிழந்தது தமிழ்நாட்டையே அதிரச் செய்தது. இந்த துயர சம்பவத்தில் பல குடும்பங்கள் இழப்பை சந்தித்தனர். விஜய் மற்றும் கழகத் தலைவர்கள் உடனடியாக நிதி உதவி அறிவித்தாலும், பாதிக்கப்பட்டவர்களை நேரில் சந்திப்பதில் தாமதம் ஏற்பட்டது.
இப்படியான சூழலில் , இன்று காலை விஜய் 20-க்கும் மேற்பட்ட பாதிக்கப்பட்ட குடும்பங்களுடன் வீடியோ கால் மூலம் தொடர்பு கொண்டு ஆறுதல் கூறியதாக தகவல்கள் வெளியாகி இருந்தது.இந்த வீடியோ கால்கள் சுமார் 15 முதல் 20 நிமிடங்கள் வரை நீடித்தன. உயிரிழந்த இளைஞர் தனுஷ்குமாரின் தாய் மற்றும் தங்கை ஹர்ஷினியுடன் பேசிய விஜய், “இது ஈடு செய்ய முடியாத இழப்பு” என்று கூறி உருகினார். தங்கைக்கு “அண்ணன் போன்று எப்போதும் உங்களுக்கு இருப்பேன்” என உறுதியளித்ததாகவும் செய்திகள் வெளியாகி இருந்தது.
மேலும், மற்ற குடும்பங்களுடனும் இதேபோல் பேசி, தவெக தேவையான உதவிகளைச் செய்யும் எனத் தெரிவித்ததாகவும், இந்தப் பேச்சுகளின் போது புகைப்படங்கள் எடுக்க வேண்டாம் என விஜய் கோரியதாகவும் தெரிகிறது.இதற்கிடையே, வேலூரில் செய்தியாளர்களை சந்தித்த அமைச்சர் துரைமுருகன், விஜய்யின் வீடியோ கால் முயற்சியை கடுமையாக விமர்சித்தார்.
இது குறித்து அவர் பேசுகையில் “தவறு செய்யவில்லை என்றால், தைரியமாக பாதிக்கப்பட்ட குடும்பங்களின் வீடுகளுக்கு நேரில் சென்று ஆறுதல் கூறியிருக்கலாம். ஆனால், தன் உள்ளம் அவரை குற்ற உணர்வால் தாக்குவதால் வெளியே வரத் தயங்கி, தொலைதொடர்பு மூலம் மட்டுமே பேசுகிறார்” என்று அவர் சாடினார். இது தவெக கழகத்தின் பொறுப்புணர்வின்மையை வெளிப்படுத்துவதாகவும் அவர் கூறினார்.
மேலும், அமைச்சர் துரைமுருகன், மோர்தானா அணைப்பகுதியை சுற்றுலா தலமாக உருவாக்குவதற்கான திட்டங்களையும் அறிவித்தார். அங்கு போக்குவரத்து வசதிகளை மேம்படுத்துவதோடு, குற்றச்சாட்டுகளைத் தடுக்க காவல் நிலையம் அமைக்கப்படும் எனத் தெரிவித்தார். கச்சத்தீவு விவகாரத்தில் பாஜக மாநிலத் தலைவர் நயினார் நாகேந்திரன் கூறிய கருத்துக்கு பதிலளிக்கும் அவர், “அவருக்கு உண்மைகள் தெரியாது. யாரோ எழுதி வைத்து பேச வைக்கிறார்கள்” என்று சிரித்தபடி தெரிவித்துவிட்டு சென்றார்.