சென்னை : தமிழ்நாடு சட்டமன்றத் தேர்தல் 2026 முடிவுகள் மாநில அரசியலில் பெரும் திருப்பத்தை ஏற்படுத்தியுள்ளன. மொத்தம் 233 தொகுதிகளில் தனித்து போட்டியிட்ட தமிழக வெற்றிக் கழகம் (தவெக), 34.92% வாக்குகளை பெற்று முதலிடத்தைப் பிடித்துள்ளது. இதன் மூலம், தவெக 108 தொகுதிகளில் வெற்றி பெற்று மிகப்பெரிய தனிக் கட்சியாக உருவெடுத்துள்ளது. எனினும், ஆட்சி அமைக்க தேவையான 118 உறுப்பினர்களின் பெரும்பான்மைக்கு இன்னும் 10 இடங்கள் குறைவாக உள்ளதால், பிற கட்சிகளின் ஆதரவை நாட வேண்டிய கட்டாய நிலை தவெகவுக்கு உருவாகியுள்ளது.
இந்த நிலை, தமிழக அரசியலில் புதிய கணக்கீடுகளையும், கூட்டணி சாத்தியங்களையும் உருவாக்கியுள்ளது. யார் தவெகவுக்கு ஆதரவு தருவார்கள்? புதிய கூட்டணிகள் உருவாகுமா? அல்லது எதிர்க்கட்சிகள் ஒன்றிணைந்து அரசை அமைக்க முயற்சிப்பார்களா? என்ற கேள்விகள் அரசியல் வட்டாரங்களில் பரபரப்பை ஏற்படுத்தியுள்ளன.
இந்த சூழலில், செய்தியாளர்களை சந்தித்த மதிமுக பொதுச்செயலாளர் வைகோ தனது கருத்தைத் தெளிவாக பதிவு செய்துள்ளார். அவர் கூறியதாவது “ஜனநாயகத்தில் மக்களின் தீர்ப்பே இறுதி. இந்தத் தேர்தலில் மக்கள் DMK-வை விட மற்றொரு கட்சிக்கு அதிக இடங்களை வழங்கியிருப்பது அந்த தீர்ப்பின் வெளிப்பாடு. அதை நாம் மதிக்க வேண்டும். ஆனால், எங்கள் கூட்டணியில் உள்ள எந்தக் கட்சியும் தங்களின் நிலைப்பாட்டில் இருந்து விலகாது. எங்களிடம் யாரும் ஆதரவு கேட்க வரமாட்டார்கள்; வந்தாலும் அந்த எண்ணமே இருக்காது. நாங்கள் உறுதியாக திமுக கூட்டணியிலேயே இருப்போம்” என்று அவர் வலியுறுத்தினார்.
மேலும், கூட்டணியில் எந்தக் கட்சியும் தவெகவுக்கு ஆதரவு அளிக்கப்போவதில்லை என்றும், அந்த கூட்டணி உறுதியாக நீடிக்கும் என்றும் வைகோ உறுதிப்படுத்தினார். திமுக தனது ஆட்சி காலத்தில் பல முக்கியமான சாதனைகளை செய்துள்ளதாகவும், அவற்றைத் தொடர வேண்டியது எதிர்கால அரசின் கடமையாக இருக்கும் என்றும் அவர் குறிப்பிட்டார்.
இதனால், தவெகவின் அடுத்த கட்ட நடவடிக்கை என்ன? அவர்கள் யாருடன் கூட்டணி அமைத்து பெரும்பான்மையை நிரூபிப்பார்கள்? அல்லது புதிய அரசியல் மாற்றங்கள் உருவாகுமா? என்பதைக் காலமே தீர்மானிக்க வேண்டிய முக்கியமான சூழல் தற்போது உருவாகியுள்ளது.