இன்பநிதியுடன் அடுத்த படமா? மாரி செல்வராஜ் சொன்ன பதில்!

அடுத்ததாக நான் தனுஷை வைத்து தான் ஒரு படத்தினை இயக்கவுள்ளேன் என இயக்குநர் மாரிச்செல்வராஜ் கூறியுள்ளார்.

ByBalaVerified account

2 Min Read

Published - 14 Oct 2025 at 13:58 IST

சென்னை :தமிழ் சினிமாவின் முக்கிய இயக்குநர்களில் ஒருவரான மாரி செல்வராஜ், தனது புதிய படமான ‘பைசன்’ மூலம் ரசிகர்களின் எதிர்பார்ப்பை உச்சக்கட்டத்திற்குக் கொண்டு சென்றுள்ளார். இயக்குநர் மாரி செல்வராஜின் கைவினையில், இளம் நடிகர் துருவ் விக்ரம் முக்கிய பாத்திரத்தில் நடித்துள்ள இந்தப் படம், தீபாவளி பண்டிகையை முன்னிட்டு வரும் அக்டோபர் 17-ஆம் தேதி திரையில் களமிறங்குகிறது.

கபடி வீரர் மணத்தி கணேசனின் உண்மை வாழ்க்கை அடிப்படையிலான இந்தக் கதை, சமூக அநீதி மற்றும் போராட்டத்தை சித்தரிக்கிறது. படத்தின் பாடல்கள், நிவாஸ் கே. பிரசன்னாவின் இசையில் அமைந்தவை, ரசிகர்களிடையே பெரும் வரவேற்பைப் பெற்றுள்ளன. அதைப்போலவே, டிரெய்லரும், வெளியாகி தமிழ் சினிமாவில் ஒரு புதிய அலையை ஏற்படுத்தும் என எதிர்பார்க்கப்படுகிறது.

இந்தப் படத்தின் வெற்றியின் முன்னதாகவே, மாரி செல்வராஜின் அடுத்த படங்கள் குறித்து சமூக ஊடகங்களில் பேச்சு எழுந்துள்ளது. கடந்த சில நாட்களாக, துணை முதல்வர் உதயநிதி ஸ்டாலினின் மகன் இன்பநிதியை கதாநாயகனாக அறிமுகப்படுத்தி படம் இயக்க உள்ளதாக தகவல்கள் வெளியாகின. இருப்பினும், இத்தகைய தகவல்கள் அதிகாரப்பூர்வ அறிவிப்பின்றி, வெறும் வதந்திகளாகவே உள்ளன. மாரி செல்வராஜ் போன்ற இயக்குநர்கள், தங்கள் கதைகளுக்கு ஏற்ற நடிகர்களைத் தேர்ந்தெடுக்கும் என்பதால், இந்தத் தகவல்கள் உண்மை என்பதை உறுதிப்படுத்த இன்னும் நேரம் ஆகும் என்பது போலவும் பேசப்பட்டது.

தொடர்ச்சியாக சினிமா வட்டாரங்களில் இது பற்றிய விவாதங்கள் தொடர்ந்து வந்த நிலையில், மாரியின் அடுத்த படம் என்ன என்பது இன்னும் மர்மமாகவே உள்ளது. இந்நிலையில், சமீபத்திய நேர்காணலில் மாரி செல்வராஜ், தனது அடுத்த படங்கள் குறித்த கேள்விகளுக்கு தெளிவான பதிலை அளித்துள்ளார்.

அந்த பேட்டியில் நடிகர் கார்த்தி மற்றும் இன்பநிதி ஆகியோருடன் படம் இயக்குவதாக உள்ள தகவல்களை மறுத்து, “என்னுடைய அடுத்த படம் தனுஷுடன்தான்” என்று அவர் உறுதியாகத் தெரிவித்தார். சூசகமாக (கார்த்தி மற்றும் இன்பநிதி ) “மற்றவர்களிடம் ஒன்லைன் சொல்லி ஓகே வாங்கியிருக்கிறேன்” என்று சிரித்துக்கொண்டே கூறிய மாரி, “கதையே இல்லாமல் வெறுமனே ஒப்பந்தம் போட்டுக்கொள்வதில் எனக்கு உடன்பாடில்லை” எனவும் திட்டவட்டமாக மாரி செல்வராஜ் தெரிவித்தார்.