இங்கே ஒரு உறுப்பினர் கூட இல்லாத நிலை வரும்! சட்டப்பேரவையில் மம்தா பானர்ஜி ஆவேசம்!

டெல்லி :மேற்கு வங்க முதலமைச்சர் மம்தா பானர்ஜி, மேற்கு வங்க சட்டமன்றத்தில் நடந்த ஒரு சிறப்பு அமர்வில், பாஜகவை கடுமையாக விமர்சித்து உரையாற்றினார். வங்கமொழி பேசும் மக்களுக்கு எதிராக மொழி தீவிரவாதத்தில் பாஜக ஈடுபட்டுள்ளதாகவும், இது வங்காள மக்களுக்கு எதிரான செயல் என்றும் குற்றம்சாட்டினார். “வங்கமொழி பேசும் மக்களுக்கு எதிராக மொழித் தீவிரவாதத்தில் பாஜக ஈடுபட்டுள்ளது. இங்கே ஒரு உறுப்பினர் கூட இல்லாத நிலை உங்களுக்கு வரும். வங்காள மக்களுக்கு எதிராக மொழி தீவிரவாதம் செய்யும் எந்த கட்சியும் வங்காளத்தில் வெற்றி பெற முடியாது,” என்று அவர் கூறினார்.

மம்தா, பாஜக ஆளும் மாநிலங்களில் வங்கமொழி பேசும் புலம்பெயர்ந்தோருக்கு எதிராக துன்புறுத்தல்கள் நடப்பதாகவும், இது ஒரு வேண்டுமென்றே அரசியல் உள்நோக்கத்துடன் செய்யப்படுவதாகவும் குற்றம்சாட்டினார். “பாஜக ஒரு வாக்கு-திருட்டு கட்சி, ஊழலில் மூழ்கியவர்கள், வங்காளிகளை துன்புறுத்துபவர்கள், மற்றும் மோசடியில் முதலிடம் வகிப்பவர்கள். பாஜக ஒரு தேசிய அவமானம், நான் அவர்களை மிகக் கடுமையாக கண்டிக்கிறேன். பாராளுமன்றத்தில் எங்கள் எம்பிக்களை CISF-ஐ பயன்படுத்தி பாஜக துன்புறுத்தியது. இங்கு வங்காளத்தில் எங்கள் குரலை அடக்க முடியும் என்று அவர்கள் நினைக்கிறார்கள். என் தலையை வெட்டினாலும், நான் வங்கமொழியில் பேசுவேன்,” என்று அவர் உணர்ச்சி மேலிட பேசினார்.

அவர் மேலும், பாஜகவை மக்களுக்கு எதிரான கட்சியாகவும், ஏழைகளுக்கும் இந்துக்களுக்கும் எதிரானவர்களாகவும் விமர்சித்தார். “பாஜக மக்களுக்கு எதிரானது, ஏழைகளுக்கு எதிரானது, இந்துக்களுக்கு எதிரானது. வங்காள மக்கள் இதை உணர்ந்து, பாஜகவை தோற்கடிப்பார்கள்,” என்று கூறினார். மம்தா, முர்ஷிதாபாத் கலவரங்களை “மாநில அரசு ஆதரவுடன் நடந்தவை” என்று பாஜக குற்றம்சாட்டியதை மறுத்து, மத்திய அரசு மற்றும் பிஎஸ்எஃப்-ஐ வங்காளத்தில் அமைதியின்மையை ஏற்படுத்துவதற்கு உடந்தையாக இருந்ததாக குற்றம்சாட்டினார்.

இந்த உரையின்போது, பாஜக எம்எல்ஏக்கள் மம்தாவின் பேச்சுக்கு எதிர்ப்பு தெரிவித்து, எதிர்க்கட்சித் தலைவர் சுவேந்து அதிகாரியின் இடைநீக்கத்தை கேள்வி எழுப்பி கோஷங்கள் எழுப்பினர். இதனால் சட்டமன்றத்தில் பரபரப்பு ஏற்பட்டது. பாஜக தலைமை ஆலோசகர் ஷங்கர் கோஷ் மற்றும் மற்றொரு எம்எல்ஏ ஆக்னிமித்ரா பால் ஆகியோர் சபாநாயகரால் இடைநீக்கம் செய்யப்பட்டு, மார்ஷல்கள் மூலம் வெளியேற்றப்பட்டனர். இந்த நிகழ்வை, “மேற்கு வங்க சட்டமன்றத்தில் ஜனநாயகத்தின் கறுப்பு நாள்” என்று பாஜக செய்தித்தொடர்பாளர் பிரதீப் பந்தாரி விமர்சித்தார்.