கரூர்:தமிழக வெற்றிக் கழக (தவெக) தலைவர் விஜயின் கரூர் வேலுச்சாமிபுரம் பிரச்சாரக் கூட்டத்தில் (செப்டம்பர் 27, 2025) ஏற்பட்ட கூட்ட நெரிசலில் 40 பேர் உயிரிழந்த சம்பவத்தைத் தொடர்ந்து, விஜய் பேசும்போது மின்சாரம் தடை செய்யப்பட்டதாக எழுந்த குற்றச்சாட்டுகளை மின்வாரிய அதிகாரி ராஜலட்சுமி திட்டவட்டமாக மறுத்துள்ளார். இந்த துயர சம்பவத்தில், 10 குழந்தைகள், 17 பெண்கள் உட்பட 40 பேர் உயிரிழந்தனர், 70-க்கும் மேற்பட்டோர் காயமடைந்து கரூர், திருச்சி, மதுரை மருத்துவமனைகளில் சிகிச்சை பெறுகின்றனர்.
சம்பவத்திற்கு ‘திட்டமிட்ட சதி’ என தவெக மதுரை உயர்நீதிமன்றத்தில் சிபிஐ விசாரணை கோரியுள்ளது. ராஜலட்சுமி செய்தியாளர்களிடம் கூறுகையில், “விஜய் பேசும்போது மின்சாரம் தடை செய்யப்படவில்லை. உயிரிழப்பு செய்தி வெளியான பிறகு இத்தகைய குற்றச்சாட்டுகள் எழுந்தன, அவை உண்மையல்ல. சில தொண்டர்கள் மரங்கள் மற்றும் மின்கம்பங்களில் ஏறியதால், பாதுகாப்பு கருதி சிறிது நேரம் மின்சாரம் நிறுத்தப்பட்டது. போலீஸ் உதவியுடன் அவர்களை இறக்கியவுடன் மின்சாரம் மீண்டும் வழங்கப்பட்டது,” என்று விளக்கினார்.
மேலும், தவெக செப்டம்பர் 26-ல் வேலுச்சாமிபுரத்தில் மின்சாரத்தை நிறுத்தக் கோரியதாகவும், இந்தக் கோரிக்கை உடனடியாக நிராகரிக்கப்பட்டதாகவும் அவர் தெரிவித்தார். “மின்தடை காரணமாக நெரிசல் ஏற்பட்டதாகக் கூறுவது முற்றிலும் தவறு,” என்று அவர் தெளிவுபடுத்தினார்.
மேலும், இந்த சம்பவம் குறித்து கரூர் மாவட்ட ஆட்சியர் தங்கவேலு, “39 பேர் சம்பவ இடத்திலேயே உயிரிழந்தனர், ஒருவர் (கவின், 31) மருத்துவமனையில் உயிரிழந்தார். காயமடைந்தவர்களுக்கு 300-க்கும் மேற்பட்ட மருத்துவர்கள் மூலம் தீவிர சிகிச்சை அளிக்கப்படுகிறது,” என்றார். ஏடிஜிபி டேவிட்சன் தேவாசீர்வாதம், தவெக முதலில் கோரிய லைட் ஹவுஸ் ரவுண்டானா (பெட்ரோல் பங்க், அமராவதி ஆறு அருகே ஆபத்தானது) மற்றும் உழவர் சந்தை (குறுகிய இடம்) ஆகியவை பொருத்தமற்றவை என்பதால், சமீபத்தில் அதிமுக 10,000-15,000 பேர் கூடிய வேலுச்சாமிபுரத்தை பரிந்துரைத்து, தவெக அனுமதி பெற்றதாக கூறினார். 500 போலீஸார் பாதுகாப்பில் இருந்தபோதிலும், 27,000 பேர் கூடியதால் நெரிசல் ஏற்பட்டது எனவும் விளக்கம் அளித்திருந்தார் என்பதும் குறிப்பிடத்தக்கது.