ஐ.பெரியசாமி வழக்கு – உயர்நீதிமன்ற உத்தரவுக்கு இடைக் காலத் தடை!

சென்னை :அமைச்சர் ஐ. பெரியசாமி மீதான சொத்து குவிப்பு வழக்கில் சென்னை உயர்நீதிமன்றத்தின் உத்தரவுக்கு உச்சநீதிமன்றம் இடைக்காலத் தடை விதித்துள்ளது. 2006-2010 ஆம் ஆண்டு வரை அமைச்சராக இருந்தபோது வருமானத்துக்கு அதிகமாக சொத்து சேர்த்ததாக ஐ. பெரியசாமி மற்றும் அவரது மனைவி சுசீலா, மகன்கள் செந்தில்குமார், பிரபு ஆகியோர் மீது 2012-ல் லஞ்ச ஒழிப்புத் துறையினர் வழக்குப் பதிவு செய்தனர்.

இவ்வழக்கில் திண்டுக்கல் சிறப்பு நீதிமன்றம் 2023-ல் பெரியசாமியையும் அவரது குடும்பத்தினரையும் விடுவித்தது. ஆனால், சென்னை உயர்நீதிமன்றம் தாமாக முன்வந்து இவ்வழக்கை மறு விசாரணைக்கு எடுத்து, விடுவிப்பு உத்தரவை 2025 ஏப்ரலில் ரத்து செய்து, ஆறு மாதங்களுக்குள் விசாரணையை முடிக்க உத்தரவிட்டது.

இதை எதிர்த்து பெரியசாமி உச்சநீதிமன்றத்தில் மேல்முறையீடு செய்தார். இன்றயை தினம், நீதிபதி தீபங்கர் தத்தா தலைமையிலான அமர்வு, உயர்நீதிமன்ற உத்தரவுக்கு இடைக்காலத் தடை விதித்து, லஞ்ச ஒழிப்புத் துறையினர் பதிலளிக்க உத்தரவிட்டு வழக்கை ஒத்திவைத்தது.

மற்றொரு தொடர்புடைய வழக்கில், 2008-ல் மறைந்த முதல்வர் கருணாநிதியின் பாதுகாவலருக்கு வீட்டு வசதி வாரிய நிலத்தை முறைகேடாக ஒதுக்கியதாக பெரியசாமி மீது 2012-ல் வழக்கு பதிவு செய்யப்பட்டது. இதில் 2023-ல் சிறப்பு நீதிமன்றம் அவரை விடுவித்தது, ஆனால் உயர்நீதிமன்றம் அதை ரத்து செய்தது. இதற்கும் 2024 ஏப்ரல் 8-ல் உச்சநீதிமன்றம் இடைக்காலத் தடை விதித்து, ஆளுநரின் முன் அனுமதி இல்லாமல் வழக்கு தொடர முடியாது என பெரியசாமி தரப்பு வாதிட்டது.

இவை அரசியல் பழிவாங்கல் காரணமாக தொடரப்பட்ட வழக்குகள் என பெரியசாமி தரப்பு கூறுகிறது. தற்போது, இரு வழக்குகளிலும் உச்சநீதிமன்றத்தின் இடைக்காலத் தடை நீடிக்கிறது, மேலும் விசாரணைக்காக தமிழ்நாடு அரசு மற்றும் லஞ்ச ஒழிப்புத் துறையினர் பதிலளிக்க உத்தரவிடப்பட்டுள்ளது.