இனிமே நிதி வழங்காத யாரையும் நான் சந்திக்க மாட்டேன்- பிரசாந்த் கிஷோர் ஸ்பீச்!

பீகார் :சட்டமன்றத் தேர்தலில் தனது ஜன் சுராஜ் கட்சி (Jan Suraaj Party) படுதோல்வியடைந்த பிறகு, கட்சித் தலைவர் பிரசாந்த் கிஷோர் தனது சம்பாத்திரத்தில் 90 சதவீதத்தை (அடுத்த 5 ஆண்டுகளுக்கு) கட்சி பிரச்சாரத்திற்கு நன்கொடையாக வழங்குவதாக அறிவித்துள்ளார். நவம்பர் 21 அன்று வெஸ்ட் சம்பரன் காந்தி ஆசிரமத்தில் நடத்திய ஒரு நாள் மௌன விரதத்திற்குப் பிறகு செய்தியாளர்களிடம் பேசிய கிஷோர், “கடந்த 20 ஆண்டுகளில் சம்பாதித்த அனைத்து சொத்துகளையும் (டெல்லி வீட்டைத் தவிர்த்து) கட்சிக்கு வழங்குவேன்” என்று உறுதியளித்தார்.

இது கட்சியின் நிதி நெருக்கடியை சமாளிக்கும் முயற்சியாகவும், தனிப்பட்ட தியாகமாகவும் பார்க்கப்படுகிறது.கிஷோர், பீகார் மக்களிடம் ஆண்டுதோறும் கட்சிக்கு ரூ.1,000 நன்கொடை அளிக்குமாறு அழைப்பு விடுத்துள்ளார். “இந்த தொகையை வழங்காத எவரையும் நான் சந்திக்க மாட்டேன்” என்று கடுமையாக எச்சரித்த கிஷோர், இது கட்சியின் நிதி சுதந்திரத்தை உறுதிப்படுத்தும் நடவடிக்கை என்று விளக்கினார். 238 தொகுதிகளில் போட்டியிட்ட ஜன் சுராஜ் கட்சி ஒரு இடத்துக்கும் வென்றிருக்கவில்லை. பெரும்பாலான வேட்பாளர்கள் டெபாசிட் இழந்தனர்.

இந்த தோல்விக்கு கிஷோர் முழு பொறுப்பேற்று, “நாங்கள் எந்த குற்றமும் செய்யவில்லை. ஆனால், மக்களை நம்ப வைக்க தவறிவிட்டோம்” என்று வருத்தம் தெரிவித்தார். இந்த அறிவிப்பு, கட்சியின் ‘பீகார் நவநிர்மாண சங்கல்ப் யாத்ரா’ (Bihar Navnirman Sankalp Yatra) தொடங்குவதற்கு முன் (ஜனவரி 15 முதல்) வலுவான அமைப்பை உருவாக்கும் முயற்சியின் பகுதி. கிஷோர், “அடுத்த 15-18 மாதங்களில் பீகார் அனைத்து வீடுகளையும் சந்தித்து, அரசின் தவறுகளை வெளிப்படுத்துவோம்” என்று கூறினார்.

கட்சியின் நிதி, தனியார் நிறுவனங்கள் மற்றும் அரசியல் நிதிகளைத் தவிர்த்து, மக்கள் ஆதரவால் இயங்க வேண்டும் என்று வலியுறுத்தினார். இந்த அழைப்பு, கட்சியின் உறுப்பினர்களிடம் உறுதியான ஆதரவைப் பெறும் என எதிர்பார்க்கப்படுகிறது. இந்த அறிவிப்பு, பீகார் அரசியலில் புதிய உத்வேகத்தை ஏற்படுத்தியுள்ளது. NDA-வின் 202 இடங்களுடன் ஆட்சி அமைத்த நிலையில், ஜன் சுராஜின் தோல்வி கிஷோரின் அரசியல் பயணத்தில் பின்னடைவாக இருந்தாலும், அவர் “பொறுமை மற்றும் தொடர்ச்சியுடன் போராடுவோம்” என்று உறுதியளித்துள்ளார்.