வயது மூப்பால் கருணாநிதியின் மகன் மு.க. முத்து காலமானார்.!

சென்னை : முன்னாள் முதலமைச்சர் கருணாநிதியின் மூத்த மகன் மு.க.முத்து (வயது 77) உடல்நலக்குறைவு காரணமாக இன்று சென்னையில் காலமானார். முதல்வர் மு.க.ஸ்டாலின் தனது சகோதரர் மு.க.முத்துவின் இறுதி அஞ்சலி நிகழ்வில் பங்கேற்க உள்ளார்.

மு.க.முத்துவின் உடல் தற்போது சென்னை ஈஞ்சம்பாக்கத்தில் உள்ள அவரது இல்லத்தில் பொதுமக்கள் மற்றும் அரசியல் பிரமுகர்களின் அஞ்சலிக்காக வைக்கப்பட்டுள்ளது. மு.க.முத்து, கருணாநிதி- பத்மாவதி தம்பதினருக்கு மகனாவார். 1970-களில் தமிழ் திரையுலகில் நடிகராக அறிமுகமான இவர், பூக்காரி, பிள்ளையோ பிள்ளை, சமையல்காரன், அணையா விளக்கு உள்ளிட்ட பல படங்களில் நடித்தவர்.

மேலும், சில படங்களில் பாடல்களையும் பாடியுள்ளார். அவரது மறைவையொட்டி, முதலமைச்சர் மு.க.ஸ்டாலின் பங்கேற்கவிருந்த அரசு நிகழ்ச்சிகள் ரத்து செய்யப்பட்டுள்ளன. அரசியல் தலைவர்கள் மற்றும் பிரபலங்கள் இரங்கல் தெரிவித்து வருகின்றனர்.