சென்னை :பாமகவின் (பாட்டாளி மக்கள் கட்சி) உள் மோதல் மீண்டும் தீவிரமடைந்துள்ளது. மருத்துவர் ராமதாஸ் தரப்பு, மதுராந்தகம் பொதுக்கூட்டத்தில் அனுமதியின்றி மாம்பழச் சின்னத்தை பயன்படுத்தியதாக கண்டனம் தெரிவித்த நிலையில், பாமக இளைஞர் அணித் தலைவரும் முன்னாள் மத்திய அமைச்சருமான அன்புமணி ராமதாஸ் கடும் பதிலடி கொடுத்துள்ளார்.
அன்புமணி ராமதாஸ் இன்று வெளியிட்ட பேட்டியில், “தேர்தல் ஆணையம் எங்களை அங்கீகரித்துள்ளது; மாம்பழச் சின்னத்தை எங்களுக்கு வழங்கியுள்ளது. மருத்துவர் ராமதாஸுடன் இருப்பவர்கள் அவரை தவறாக வழிநடத்துகின்றனர்” என்று குற்றம்சாட்டினார். தேர்தல் ஆணையம் பாமகவுக்கு அங்கீகாரமும், சின்னமும் கொடுத்த பிறகு இதுபோன்ற குற்றச்சாட்டுகள் எழுப்புவது அர்த்தமற்றது என்றும் அவர் தெரிவித்தார்.மேலும் அன்புமணி கூறுகையில், “அய்யாவை (ராமதாஸ்) ஒரு கும்பல் தவறாக வழிநடத்துகிறது.
அவர்களால் தான் இந்த குழப்பங்கள் ஏற்படுகின்றன. பாமகவின் உண்மையான தலைமை எங்களிடம் தான் உள்ளது. தேர்தல் ஆணையத்தின் அங்கீகாரம் எங்களுக்கு வழங்கப்பட்டுள்ளது” என்று வலியுறுத்தினார். மாம்பழச் சின்னத்தை பயன்படுத்துவதற்கு தங்களுக்கு முழு உரிமை உள்ளது என்றும் அவர் தெளிவுபடுத்தினார்.இந்த விவகாரம் பாமகவின் உள் பிளவை மீண்டும் வெளிப்படையாக்கியுள்ளது.
ராமதாஸ் தரப்பு சின்னம் தொடர்பான வழக்குகள் தேர்தல் ஆணையத்தில் நிலுவையில் உள்ளதாகக் கூறி வரும் நிலையில், அன்புமணி தரப்பு தேர்தல் ஆணையம் தங்களுக்கு சின்னத்தை ஒதுக்கியுள்ளதாக உறுதியாகக் கூறுகிறது. இதனால் கட்சியின் சின்னம் யாருக்கு சொந்தம் என்பது குறித்து மீண்டும் சர்ச்சை எழுந்துள்ளது.இந்த பிரச்னை 2026 சட்டமன்றத் தேர்தலுக்கு முன்பு பாமகவின் எதிர்காலத்தை பெரிதும் பாதிக்கும் என்று அரசியல் வட்டாரங்கள் கருதுகின்றன. ராமதாஸ் – அன்புமணி இடையேயான மோதல் தொடர்ந்து தீவிரமடைந்து வரும் நிலையில், கட்சியின் நிர்வாகிகள் மற்றும் தொண்டர்களிடையே குழப்பம் நீடிக்கிறது. தேர்தல் ஆணையத்தின் இறுதி முடிவு இந்த சர்ச்சைக்கு முடிவு கட்டும் என்று எதிர்பார்க்கப்படுகிறது.