IND vs ENG : காயத்தால் வெளியேறிய ரிஷப் பந்த்…எவ்வளவு நாள் விளையாட முடியாது?

மான்செஸ்டர் : இந்திய கிரிக்கெட் அணியின் விக்கெட் கீப்பர்-பேட்ஸ்மேன் ரிஷப் பந்த், ஓல்டு ட்ராஃபோர்டில் நடைபெறும் நான்காவது டெஸ்ட் போட்டியின் முதல் நாளில் கால் விரலில் எலும்பு முறிவு ஏற்பட்டதால் ஆறு வாரங்களுக்கு விளையாட முடியாத நிலையில் உள்ளார். இந்திய கிரிக்கெட் வாரிய (பிசிசிஐ) வட்டாரங்களை மேற்கோள் காட்டி இந்த செய்தியை இந்தியன் எக்ஸ்பிரஸ் செய்தி வெளியிட்டுள்ளது.

இந்தக் காயம், நடப்பு டெஸ்ட் மட்டுமல்லாமல், ஜூலை 31 முதல் ஆகஸ்ட் 4 வரை நடைபெறவுள்ள ஐந்தாவது மற்றும் இறுதி டெஸ்ட் போட்டியிலும் பந்த் பங்கேற்க முடியாது என்பதை உறுதிப்படுத்துகிறது. அவருக்கு ஏற்பட்ட இந்த காயம் 68-வது ஓவரில், பந்த் 37 ரன்களில் நம்பிக்கையுடன் ஆடிக்கொண்டிருந்தபோது, இங்கிலாந்து வேகப்பந்து வீச்சாளர் கிறிஸ் வோக்ஸுக்கு எதிராக ரிவர்ஸ் ஸ்வீப் முயற்சித்தபோது ஏற்பட்டது. பந்து பேட்டின் உள்புற விளிம்பில் பட்டு, அவரது வலது கால் விரலில் பலமாகத் தாக்கியது.

உடனடியாக வலியில் தரையில் விழுந்த பந்த், காலைப் பிடித்தபடி துடித்தார். மைதானத்தில் இரத்தக் காயமும், கால் வீக்கமும் ஏற்பட்டதால், பிசியோக்கள் உடனடியாக அவருக்கு முதலுதவி அளித்தனர்.பந்த், கையுறைகளை கழற்றிவிட்டு, உதவியுடன் மைதானத்தை விட்டு வெளியேறினார் மற்றும் மருத்துவ வாகனத்தில் மருத்துவமனைக்கு அழைத்துச் செல்லப்பட்டார். அவருக்கு பதிலாக ரவீந்திர ஜடேஜா மைதானத்தில் இறங்கினார். மருத்துவக் குழு, வலி நிவாரணி மருந்து கொடுத்து பந்தை மீண்டும் பேட்டிங்கிற்கு அனுப்ப முடியுமா என ஆலோசித்து வருகிறது.

ஆனால், அவர் நடக்க உதவி தேவைப்படுவதால், மீண்டும் ஆடுவது கடினமாக உள்ளது. முன்னாள் வீரர்களான ரிக்கி பாண்டிங் மற்றும் மைக்கேல் ஆதர்டன், ஸ்கை ஸ்போர்ட்ஸில் இந்தக் காயத்தின் தீவிரத்தைப் பற்றி விவாதித்தனர். “பந்த் தனது காலை தரையில் வைக்க முடியவில்லை. உடனடி வீக்கம் கவலை அளிக்கிறது. இது மெட்டாடார்சல் எலும்பு காயமாக இருக்கலாம், இவை மிகவும் உடையக்கூடியவை,” என்று பாண்டிங் குறிப்பிட்டார்.

பந்தின் இந்த காயம் இந்திய அணியின் நெருக்கடியை மேலும் அதிகரிக்கிறது. ஏற்கனவே நிதிஷ் குமார் ரெட்டி (முழங்கால்), ஆகாஷ் தீப் (தொடை), மற்றும் அர்ஷதீப் சிங் (கட்டைவிரல்) ஆகியோர் காயத்தால் அவதிப்படுகின்றனர். முதல் நாள் முடிவில் இந்தியா 264/4 என்ற நிலையில் உள்ளது, ஜடேஜா மற்றும் ஷர்துல் தாக்கூர் ஆட்டத்தை முடித்தனர். பந்தின் இடத்தை நிரப்ப, இஷான் கிஷனை அணியில் சேர்க்க தேர்வுக்குழு திட்டமிட்டுள்ளது எனவும் தகவல்கள் வெளியாகியுள்ளது. அவருக்கு பதிலாக எந்த வீரர் விளையாடப்போகிறார் என்பதை பொறுத்திருந்து பார்ப்போம்.